ಸಿಮ್ ಕಾರ್ಡ್ ಕುರಿತು ಮಹತ್ವದ ನಿರ್ಧಾರ: ಹೊಸ ವರ್ಷದಿಂದ ಹೊಸ ನಿಯಮ
ದೆಹಲಿ: ಟೆಲಿಕಾಂ ವಲಯದಲ್ಲಿ, ಮೊಬೈಲ್ ಬಳಕೆದಾರರನ್ನು ನೋಂದಾಯಿಸಲು ಬಹಳ ಸಮಯದಿಂದ ನಡೆಯುತ್ತಿದ್ದ ಪೇಪರ್ ಆಧಾರಿತ ಕೆವೈಸಿ ಪ್ರಕ್ರಿಯೆ ಇದೀಗ ಸ್ಥಗಿತಗೊಳ್ಳಲಿದೆ. ದೂರಸಂಪರ್ಕ ಇಲಾಖೆ ತನ್ನ ಪ್ರಕಟಣೆಯಲ್ಲಿ ನೂತನ ನಿಯಮವನ್ನು ಜಾರಿಗೆ ತಂದಿದ್ದು, ಇದನ್ನು ರಿಲಯನ್ಸ್ ಜಿಯೋ, ಏರ್ಟೆಲ್ ಮತ್ತು ವೋಡಾಫೋನ್ ಐಡಿಯಾ ದಂತಹ ಟೆಲಿಕಾಂ ಕಂಪನಿಗಳು ಕೂಡ ಸ್ವಾಗತಿಸಿವೆ. ಈ ನಿಯಮವು ಹೊಸ ವರ್ಷದ ಮೊದಲ ದಿನ ಅಂದರೆ ಜನವರಿ 1, 2024 ರಿಂದ ಜಾರಿಗೆ ಬರಲಿದೆ.
ಟೆಲಿಕಾಂ ಕಂಪನಿಗಳ ಪರಿಶೀಲನೆ ಪ್ರಕ್ರಿಯೆಯ ವೆಚ್ಚವನ್ನು ಕಡಿಮೆ ಮಾಡಲು ಮತ್ತು ಎಲ್ಲಕ್ಕಿಂತ ಹೆಚ್ಚಾಗಿ ಸಿಮ್ ಕಾರ್ಡ್ ವಂಚನೆಯನ್ನು ತಡೆಯಲು ಡಾಟ್ ಡಿಜಿಟಲ್ ಕೆವೈಸಿ ಪ್ರಕ್ರಿಯೆಯನ್ನು ಜಾರಿಗೆ ತರಲಿದೆ.
ಸದ್ಯ ಅಸ್ತಿತ್ವದಲ್ಲಿರುವ ಪರಿಶೀಲನಾ ವಿಧಾನ ಎಂದರೆ, ಪೇಪರ್ ಆಧಾರಿತ ನೋಂದಣಿಗೆ ಬಳಕೆದಾರರು ಫಾರ್ಮ್ ಅನ್ನು ಭರ್ತಿ ಮಾಡುವುದು, ಫೋಟೋವನ್ನು ಲಗತ್ತಿಸುವುದು ಮತ್ತು ವಿವಿಧ ಗುರುತಿನ ದಾಖಲೆಗಳನ್ನು ನೀಡಬೇಕಿದೆ. ಈಗ ಈ ಹಳೆಯ ಪ್ರಕ್ರಿಯೆಯಲ್ಲಿ ಸಂಪೂರ್ಣ ಬದಲಾವಣೆ ಮಾಡಲಾಗುತ್ತಿದ್ದು, ಮೊಬೈಲ್ ಬಳಕೆದಾರರ ನೋಂದಣಿಗಾಗಿ ಡಿಜಿಟಲ್ ಕೆವೈಸಿ ಪ್ರಕ್ರಿಯೆಯನ್ನು ತರಲಾಗುತ್ತಿದೆ.
ಇನ್ನು ಕಾಗದ ಆಧಾರಿತ KYC ಅನ್ನು ರದ್ದುಗೊಳಿಸಿ ಮೊಬೈಲ್ ಬಳಕೆದಾರರ ದಾಖಲಾತಿಗಾಗಿ ಡಿಜಿಟಲ್‌ಗೆ ಹೋಗುವ ನಿರ್ಧಾರವು ಟೆಲಿಕಾಂ ಕಂಪನಿಗಳಿಗೆ ವೆಚ್ಚವನ್ನು ಕಡಿಮೆ ಮಾಡುತ್ತದೆ ಎಂದು ಉದ್ಯಮದ ಅಧಿಕಾರಿಗಳು ತಿಳಿಸಿದ್ದಾರೆ. ಸಿಮ್ ಕಾರ್ಡ್ ವಂಚನೆಯನ್ನು ಪರಿಶೀಲಿಸಲು ಇದು ಸರ್ಕಾರಕ್ಕೆ ಸಹಾಯ ಮಾಡುತ್ತದೆ.